Die projek word in twee fases uitgevoer. Die eerste fase behels ’n opname en identifikasie van nematofage fungi teenwoordig op skaapplase, asook die daarstelling van ’n fungi biblioteek. Mismonsters wat na die parasitologie laboratorium vir miseiertelling ontledings gebring is, is vir die kweek van fungi gebruik. Drie veskillende tipes groeimedia is gebruik, naamlik water agar (WA), sabouraud dekstrose agar (SDA) en aartappel dekstrose agar (ADA). Chloramfenikol is by die SDA media gevoeg om bakteriese groei te inhibeer, terwyl die pH van die ADA media met wynsteensuur aangepas is. ’n Metode gabaseer op die Baermann tegniek is gebruik vir die eerste oes van die geparatiseerde larwes en fungi kulture. Die oplossing van die Baermann apparaat is oorgeplaas op die drie groeimedia, by kamertemperatuur geïnkubeer en elke 24 h vir ’n 3 weke periode vir swamgroei ondersoek. Suiwer kulture is daarna gevestig deur drie opeenvolgende isolasies. ’n Filtreerpapier metode is gebruik vir bewaring van die fungi vir die fungi biblioteek. Die larwe en fungi aktiwiteite is deur middel van ’n disseksie mikroskoop bestudeer.

Reeds op die eerste dag is beide parasitiese en vrylewende nematode larwes op al die groeimedia gesien. Die teenwoordiheid van vrylewende nematode kan toegeskryf word aan die feit dat die meeste mismonsters geneem is vanaf mis wat op die grond gelê het. Swamgroei is waargeneem op die SDA en ADA plate na die eerste 24 h periode. Daar was geen swamgroei op die WA plate nie, selfs nie na 3 weke inkubasie nie.

Blokkies van die swambevattende agar is vervolgens vanaf agt van die SDA plate gesny en oorgeplaas op die kante van agt van die WA agar plate wat wel larwes bevat het. Dit is gedoen om swam en larwe aktiwiteit en enige mootlike interaksie tussen die twee te bestudeer. Daar was wel ’n aantal onbeweeglike nematode nader aan die swamblokkies, in vergelyking met die konsentrasie van bewegende nematode verder van die blokkies af, wat op ’n moontlike swam-nematode interaksie kan dui. Tot dusver was dit nog nie moontlik om die meganisme en metode waarmee die fungi die larwes besmet, te bestudeer en te beskryf nie. Fungi van die SDA en ADA plate is geïsoleer en suiwer kulture is gevestig deur twee opeenvolgende isolasies op nuwe SDA en ADA plate.

Die fungi op die filtreerpapier het binne 48 h begin sporuleer. Die filtreerpapier is vanaf die groeimedium geskei en in steriele petrie bakkies geplaas. Die petrie bakkies is teen kamertemperatuur geïnkubeer totdat die papier en fungi heeltemal uitgedroog is. Die filtreerpapier is daarna in klein steriele koeverte, binnein genommerde, plastieksakkies geplaas. Vyf, klein stukkies van die droë filtreerpapier is vervolgens op nuwe SDA groeimedia geplaas. Na ’n week van inkubasie, is fungi met dieselfde kolonie eienskappe as die oorspronklike fungi geoes. Hierdie bewaringsmetode sal dus gebruik word vir die doeleindes van