Trane is ingesamel van beide oë van 20 normale (kontrole), 20 DOS sowel as 20 KK vrywilligers. Trane is versamel deur gebruik te maak van vlam-gepoleerde 10 μL kapillêre buise. Die punt van die kapillêre buis is in kontak geplaas met die traanmeniskus naby die boonste en onderste lakrimale punkta bo die onderste ooglid. Basale trane was versigtig versamel deur te verhoed dat die kapillêre buis nie in kontak met die oogbal kom nie. Die rede hiervoor was om die produseer van reflekstrane te verhoed, aangesien die vloeitempo van die traanvloeistof tydens die versameling ’n uitwerking kan hê op die samestelling van die vloeistof. Die traanmonsters is gestoor by -80 °C. Geen lid in die kontrolegroep dra kontaklense nie en was ook vry van enige okulêre siekte vir ten minste drie jaar voor die aanvang van die studie. Die kontrole en DOS-pasiënte is deur middel van ’n Okulêre Oppervlak Siekte Indeks-vraelys (OOSI) gediagnoseer. DOS-pasiënte was verder in twee groepe opgedeel op grond van die OOSI-vraelys: Matige DOS- en ernstige DOS-lyers. KK-pasiënte is gediagnoseer deur middel van ’n spleetlamp biomikroskopiese toets. Ensiem-gekoppelde Immunosorbentbepalings is toegepas om die konsentrasie van afskeidings-Immunoglobulien A (sIgA), Tumor-nekrosefaktor-alfa (TNF-α) en Matriks Metalloproteïnase-1 (MMP-1) in trane van die drie groepe te bepaal. Alle prosedures met betrekking tot menslike handeling het voldoen aan die etiese bepalings van die Helsinkiverdrag. Die verskille tussen die DOS- en KK-groepe is vergelyk met die kontrole groep met behulp van ’n gepaarde t-toets vir die parametriese data en die Mann/Whitney-toets vir die nie-parametriese data. Die p-waarde < 0.05 word as ‘n beduidende verskil beskou. Die vlakke van sIgA en MMP-1 was aansienlik verlaag in pasiënte met KK, vergeleke met die kontrolegroep (p = 0.0317, p = 0.0286). ’n Beduidende verlaging in die vlak van sIgA is gevind in die ernstige DOS groep. Hierteenoor is ’n beduidende toename in TNF-α gevind in die gematigde DOS-groep (p = 0.0013, p = 0.037). Geen beduidende veranderinge is waargeneem in die vlakke van MMP-1 in DED en TNF-α by KK-pasiënte nie. Ons resultate is in stryd met ’n vorige studie, wat ’n beduidende toename in die vlak van MMP-1 in trane van pasiënte met KK aangedui het. Daar is ook vroeër beweer dat sIgA verhoog is, waar dit in hierdie studie afgeneem het. Ons data stem wel ooreen met vorige bevindinge dat daar ’n beduidende afname is in die sIgA-vlakke tussen die DOS-groepe. Die TNF-α vlakverhoging in die trane van DOS-pasiënte wat vroeër gemeld is blyk dieselfde te wees as in ons studie, maar vroeër studies met betrekking tot TNF-α in die trane van KK pasiënte is in stryd met ons bevindinge siende dat ons studie geen beduidende veranderinge toon nie. Ons ontledings dui daarop dat DOS sowel as KK geassosieer kan word met die differensiële uitdrukking van verskeie proteïene. Hierdie studie het dus ’n blik op heelwat omstrede gapings in die wetenskapsliteratuur gelewer.