Hierdie referaat handel oor die estetiese en funksionele landskapversteuring wat voorgestelde windplase vir die Weskusstreek van Suid-Afrika inhou. Die doel van die navorsing was om te bepaal of die sosiale aanvaarding of verwerping van windplase in die streek deur inwoners en besoekers se evaluering van die visuele en funksionele waarde van die natuurlike landskap beïnvloed word. Die kriteria vir visuele-impakstudies van windplase in Suid-Afrika word krities beoordeel. Die resultate dui aan dat die visuele indringing van windturbines die impak is waaroor respondente die minste besorg is – anders as wat in die internasionale literatuur oor hierdie tema gerapporteer word. Die referaat bevraagteken die redes vir hierdie afwyking in die konteks van Suid-Afrika se ernstige elektrisiteitstekort. Daar is bevind dat visuele-impakstudies nie toereikend is om landskappe in die konteks van windplaas ontwikkeling te evalueer nie. Hierdie referaat bepleit die gebruik van deelnemende geografiese inligtingstelsels (DGI) ter aanvulling van die assesserings metodes wat tans ten opsigte van die aanwending van windenergie gevolg word.