Daar bestaan reeds verskeie segregasiemodelle wat die oppervlakkonsentrasie van die segregerende spesie as ’n funksie van tyd en temperatuur kan beskryf. Hierdie modelle neem egter nie die verdamping of sublimasie van die segregerende spesie in ag nie. Eksperimentele segregasiestudies vind gewoonlik in ’n ultrahoë vakuum plaas, wat die kans op verdamping aansienlik verhoog.

Alhoewel pogings aangewend is om segregasiemodelle wat verdamping in ag neem te ontwikkel, voorspel hierdie modelle die segregasiegedrag in òf die konsentrasiekinetika òf die konsentrasie-ewewigsgebiede. Daarbenewens is die invloed van verdamping in vroeëre eksperimentele studies gerieflikheidshalwe geïgnoreer. In hierdie ondersoek is die verdamping van Sb van ’n Cu-oppervlak tydens segregasie in ’n Cu (110) 0.2% Sb gemeet. Die resultate sal tesame met ’n gewysigde Darkenmodel gebruik word om die segregasieprofiel, insluitende die gevolge van verdamping, te voorspel. ’n Eersteordebenadering tot die model, asook die veranderinge wat aan die manipulator van ’n Augerelektronspektroskopie-spektrometer aangebring is ten einde die verdampingsinvloed te kwantifiseer, sal bespreek word.