Waterskilpaaie dien as gashere vir ‘n groot verskeidenheid interne parasiete. Die parasiete word dus saam met die skilpaaie versprei. Wanneer skilpaaie vrygelaat word en natuurlike populasies vestig, kan hulle parasiete van gashere verwissel en inheemse spesies infekteer. Evolusionêre ou parasiet verhoudings het selde negatiewe effekte op gashere, maar wanneer gasheerwisseling plaasvind en nuwe parasietiese assosiasies vorm, kan infeksies vir die gasheer nadelig wees. Die oogmerk van hierdie studie is om te bepaal tot watter mate indringende bloed en platwurm parasiete versprei het vanaf die Amerikaanse varswaterskilpaaie na die inheemse spesies in Frankryk en Suid Afrika en of hulle bedreigings vir plaaslike spesies inhou. Skilpaaie word gevang deur fuike te stel met lewer en sardientjies as aas. Die fuike word binne in riviere, damme, of ander waterliggame gestel waar skilpaaie waargeneem word en oornag gelaat. Die fuike word die volgende dag verwyder en as skilpaaie gevang is, word hulle in aparte houers met water tot ‘n diepte van 5 cm geplaas. Om parasieteiers te verwyder word die water die volgende dag deur 500 µm en 100 µm siwwe afgespoel. Die inhoud van die sif word dan in ‘n petribakkie afgespoel en onder ‘n disseksie mikroskoop ondersoek vir platwurm parasieteiers. Die eiers word versamel en in 70% ethanol gefikseer. Deur molekulêre analises bepaal ons dan die identiteit van die betrokke parasiet.